LAOAG CITY – Maysa a fan ti pelikula a “Ghostbusters” idiay United Kingdom ti nakagun-od ti world record gapu iti kinadakkelna a memorabilia collection daytoy.
Kinumpirmaran ti records keeping organization a Guinness World Records a ni Darren McQuade ti baro a world record holder iti titulo a “Largest Collection of Ghostbusters memorabilia” gapu iti koleksionna a dumanonen iti 2,012 items.
Para ken ni Macquade, saan laeng a basta a paboritona ti pelikula a “Ghostbusters” no di ket karaman pay daytoyen iti kinataona.
Nangrugi ti pannakahiligna nga agkolektar ti Ghostbusters memorabilia idi ubing pay isuna kalpasan a nabuyana ti kaunaan a pelikula daytoy idi 1984.
Agtartrabaho kas professional magician ni Macquade ken masansanna nga iramraman ti tricks-na dagiti sumagmamano a “Ghostbusters-themed magic tricks.”
Adu kadagiti koleksionna ket maibaga a manmano laeng ken nabalor ngem ti kapatgan a banag nga adda ti pakainaiganna iti “Ghostbusters” ket ti kapadasanna a nagbalin nga extra iti maikatlo a sequel daytoy a “Ghostbusters: The Frozen Empire” a nairuar laeng idi Marso 2024.
Nupay nga arig museum ti “Ghostbusters” ti pagtaengan ni Macquade gapu iti kinaadu dagiti koleksionna ket awan pay ti plano nga isardeng ti panagkolektar iti daytoy.
