LAOAG CITY – Natakawan ti maysa a farm supply iti Brgy. 57-Pila ditoy siudad ti Laoag ken kukua ti maysa a residente iti Brgy 58-Casili babaen kadagiti saan pay nabigbig a suspek.
Segun iti PNP-Laoag, naduktalan lattan ti agtagikua ti nasao a farm supply a naiwar-wara dagiti ramit iti uneg ti pagtagilakoan.
Mainaig iti daytoy, nakita dagiti otoridad bayat ti pannakaiyuswat ti imbestigasyon a napwersa a nalukatan ti tawa nga adda iti likod ti farm supply idinto a nabuon pay ti glass a ridaw a mangkonektar iti cr, display room ken ti cashier’s booth a nangalaan dagiti suspek ti kwarta nga agdagup ti nasurok kumurang 11,000 a pisos.
Karaman pay nga innala dagiti suspek dagiti nagduduma nga klase ti herbicide, insecticide, bukbukel pakairamanan ti TB hardrive para iti CCTv ken ti ignition key para iti Hondo TMX a motorsiklo.
Rumrumuar nga agdagup iti P22,151 dagiti natakaw a lako manipod iti nasao a farm supply malaksid iti cash.
Iti agdama ket agtultuloy ti pannagdeterminar dagiti otoridad iti posible a pakabigbigan dagiti suspek.
Manarimaan met ti eksaminasyon ti INCLO-SOCCO iti tallo a nakolektar a blood stain ken maysa a latent print manipod iti nabuong a ridaw a sarming.
