LAOAG CITY – Binabalaw ti Federation of Free Farmers (FFF) ti plano ti National Food Authority (NFA) a panangilako ti daan nga stock ti bagas kadagiti Local Government Unit.
Segun ken ni Federation of Free Farmers National Manager Raul Montemayor, iligal ti plano ti National Food Authority ken daytoy ket panaglabsing iti nailanad iti Republic Act (RA) 12708 wenno ti Agricultural Tariffication Act. Ti nasao a linteg ket ti baro a pirma a nangamendar iti RA 11203 wenno ti Rice Tariffication Law.
Inbatadna a kasapulan pay laeng a maaddaan ti deklarasion ti food emergency tapno agserbi a legal a pangibasaran iti panaglako ti daan a suplay ti bagas iti nababbaba a presio.
Inlawlawagna a mabalin daytoy nga ideklara no maaddaan ti shortage wenno panagkurang ti bagas ken no addaan ti ‘extraordinary’ wenno nalabes a panagngato ti presio ti bagas.
Naammoan nga amin dagitoy ket maibasar iti pagannurotan a buklen ti National Price Coordinating Council (NPCC).
Iti agdama, maibilang nga iligal ti addang ti National Food Authority gapu ta saan pay a nangideklara ti Department of Agriculture ti food security emergency.
