LAOAG CITY – Nagbalin a naisangsangayan ti naisayangkat a Farmers Market kabayatan ti Vintar International Reunion (VIR) 2025 iti ili ti Vintar.
Nagbalin a paset iti nasao a reunion dagiti balikbayan manipud kadagiti nagduduma a paset ti lubong.
Ti nasao a reunion ket isu ti maika-7 a Biennial Vintar International Reunion babaen ti panangidaulo ni Mrs. Nila L. Flores, dati a presidente ti Vintar International kenni Atty Noriel L. Flores, agdama a Presidente ti Vintar International.
Iti pannakaisayangkat ti Farmers Market ket ditoy a nailako dagiti nagduduma a produkto dagiti mannalon iti ili ti Vintar.
Naragsakan dagiti balikbayan iti pannakailako dagiti produkto dagiti mannalon iti ili ti Vintar a mangipaneknek iti nabuslon nga apit dagiti maseknan.
Malaksid iti daytoy ket adda pay dagiti dadduma a nailako a pakairamanan dagiti pagpigadan nga aramid dagiti kameng ti Pangkabuhayan Program ti lokal a gobierno, kasta met dagiti processed foods nga aramid ken partuat dagiti small and medium entrepreneurs iti nasao nga ili.
