LAOAG CITY – Ngimmato ti farmgate price ti irik idi Enero 2026, basar iti report ti Philippine Statistics Authority (PSA).
Rumrummuar iti monitoring ti nasao nga ahensia nga umaboten iti P20.10 ti kada kilo a presio ti irik iti napalabas a bulan, sumurok dua a piso a nangatngato maidasig iti P18.01 a presio idi Disiembre iti napalabas a tawen.
Nupay kasta, apagapaman a nababbaba latta ti nasao a presio maidasig iti farmgate price idi Enero 2025.
Apagapaman a ngimmato ti presio ti regular milled rice daytoy iti umuna a paset ti Pebrero maidasig idi bulan ti Enero.
Basar iti datos ti Philippine Statistics Authority, ngimmato ti 4.1% ti presio manipud iti dati a P43.76 ti kada kilo a mapagbalin nga agdama a P45.54 ti kada kilo.
Naammoan a no idasig iti kapada a bulan iti napalabas a tawen, nababbaba ti average price ita a tawen gapu ta umabot idi ti P47.77 ti kada kilo a presio ti regular milled rice.
Daytoy ket sumurok dua a pisos a nangatngato maidasig iti agdama a presio.
