LAOAG CITY – Apagapaman a ngimmato ti farmgate price ti irik idi Pebrero basar iti monitoring ti Philippine Statistics Authority (PSA).
Segun iti ahensia, agingga iti 10.4% ti nagngatoan ti farmgate price no sadinno nga immabot iti P22.47 iti kada kilo ti national average a presio ti namaga nga irik.
Nangatngato daytoy maidasig iti kapada a panawen iti napalabas a tawen.
Nairekord idiay Cagayan Valley ti kangatoan a presio ti irik nga umabot iti P28.12 iti kada kilo nga adda ti panagngatona a 44.3% maidasig iti napalabas a tawen.
Immabot iti P25.86 iti kada kilo ti average farmgate price idiay Central Luzon a mabigbigbig kas rice-producing region.
Kabayatanna, ti Caraga Region ti nakairekord ti kababaan a presio iti P17.96 iti kada kilo.
Patta-pattaen ti Philippine Statistics Authority ti posible a panagbaba ti produksion ti irik iti umuna a quarter ti 2026 ti agingga iti 7.1% basar iti panangtingiting kadagiti bulto ti standing crops idi Pebrero.
