LAOAG CITY – Saan a napintas a wiring ti makitkita a rason ti Bureau of Fire Protection iti ili ti Bangui, ti pannakauram ti van a kukua ni Marlon Torado a nakairamanan a nauram ti maysa kadagiti gasoline pump ti gasolinaan iti Brgy. Lanao iti ili ti Bangui.
Daytoy ti rimwar a resulta iti pakpakauna nga imbestigasyon dagiti kameng ti BFP iti nasao nga ili.
Mainaig iti daytoy, inpakaammo ni Police Capt. Julius Basallo, hepe ti PNP Bangui nga agpakarga kuma ti krudo ti van idi maripar ti gasoline boy nga agas-asok ti hood ti lugan.
Kuna na a kalpasan ti sumagmamano a minotos ket gimmil-ayab ti van ken dagus a rinamram na ti maysa kadagiti pump.
Segun kenni Basallo, naminpinsan a nauram ti nasao a van ken kagatgatang laeng daytoy ni Torado ken intest drive na idi kalman.
Mapatta-patta nga umabot ti agarup dua a milyon a pisos ti balor dagiti nauram ngem agdependar to pay laeng iti no ania ti ibaga ti Bureau of Fire Protection.
Innayon ni Basallo nga agtultuloy pay laeng ti imbestigasyon dagiti kameng ti BFP Bangui.
Kabayatanna, inlawlawag ni Dumalneg Vice Mayor Francis Espiritu, agtagikua iti gasoline station no ania dagiti napasamak sakbay a nauram ti van ni Torado.
Kuna na a nagkinnokin-od ti nasao a lugan kalpasan na ket naiddep iti kabatugan ti cashier ti gasolinaan a ni Anthony Santos kageddan iti pannakakita nga umas-asoken daytoy.
Segun kenni Espiritu, binilin ni Santos ti kadua nga iddepen ti circuit breaker tapno agrekep amin dagiti underground tank ti gasolinaan.
Innala ni Santos ti fire extinguisher ken tallo dagiti nausar bayat nga idur-duron da ti van idinto a ti driver ti van ket bimmaba ken innala na ti tulbek ti lugan rason a nag-lock daytoy ket naidungpar iti batug ti gas pump.
Inbatad na a saan a maliklikan nga adda latta mabati a krudo wenno gasolina kadagiti hose wenno iti nuzzle dagiti gas dispenser.
Dinayaw ni Espiritu ti panagresponde dagiti kameng ti Bureau of Fire Protection iti ili ti Pagudpud ken ti Bangui agraman ti PNP gapu ta nalapdan da ti possible a panagwaras ti apoy.
Innayon na a ti Bureau of Fire Protection ken ti Philippine National Police ti mangibaga ti resulta ti imbestigasyon ti nasao nga insidente.
