LAOAG CITY – Nagpanawagan ti maysa a grupo ti konsyumer iti Food and Drug Administration (FDA) nga agtignay kontra iti maipagarup a panaglabsing kadagiti sumagmamano a merkado iti labeling regulations nga intuding ti Department of Health (DOH) tapno maipasigurado ti kinatalged ken proteksion dagiti gumatgatang.
Ginutigot ti Malayang Konsyumer (MK), maysa a koalisyon dagiti mangitantandudu ti pagsayaatan ken dagiti pagrebbengan dagiti konsyumer, ti Food and Drug Administration a kitaen dagiti reklamo a maaw-awatda maipapan kadagiti mailaklako a maipagarup a kwestionable no asino ti nagaramid ken sadino ti nagaramidanda nga addaan ti tatak a “Product of China.”
Inbatad ni MK Spokesman Atty. Simoun Salinas, iti Section VI A.5 ti Department of Health circular, nakaikabil iti maysa a produkto ti kumpleto a nagan ken address ti manufacturer, repacker, packer, importer, trader wenno distributor ti taraon.
Nailanad iti Department of Health Circular, nasken a siguraduen ti publiko iti amin a gundaway iti baet ti panagadu iti pagilian ti prepackaged food ken epektibo a maaramid daytoy iti babaen ti panangikabil ti consumer information iti label ti maysa a produkto a taraon.
