LAOAG CITY – Nagballaag ti Food and Drug Administration (FDA) iti publiko maipapan iti saan a nairehistro a produkto ti taraon a maawagan iti Chobiz Milk Coated Biscuit.
Segun iti FDA Advisory No. 2024-1142, daytoy a produkto ket saan a nairehistro iti ahensia ken saan pay a nasubok a nasayaat para iti kinatalged ken kalidad.
Ballaagan ti ahensia dagiti konsumer a saanda a gumatang ken agkonsumo iti nadakamat a produkto gapu ta mabalin a pakaigapuan ti peggad iti salun-at.
Nakitan a mailaklako ti Chobiz Milk Coated Biscuit iti nagduduma a merkado ngem awan ti permit manipud iti Food and Drug Administration.
Agtultuloy ti panagmonitor ken panagimbestigar ti ahensia tapno masigurado ti kinatalged dagiti produkto a taraon ditoy pagilian.
Kabayatanna, nagpalagip ti ahensia iti publiko a gumatang laeng kadagiti produkto nga addaan iti umno a rehistrasion ken sertipikasion manipud iti Food and Drug Administration tapno maliklikan ti posible a peggad.
