LAOAG CITY – Nagballaag ti Food and Drug Administration (FDA) iti publiko a saan nga usaren wenno gumatang iti Unbranded Guyabano Leaves Tea gapo ta daytoy ket saan a rehistrado.
Iti naiyuswat a beripikasyon ti ahensya babaen iti online monitoring wenno ti post-marketing surveillance iti produkto, naduktalan a saan a rehistrado ken awanan ti Certificate of Product Registration (CPR) a naisyu.
Gapo ta ti produkto ket saan a dimmalan iti naan-anay nga evaluation process babaen iti Food and Drug Administration, saan a maipasigurado ti kalidad ken kinatalged daytoy.
Iti babaen ti Republic Act No. 9711 wenno ti “Food and Drug Administration Act of 2009”, ti panagaramid, panaglako, panangidiaya ken panagibunong iti anyaman a produkto nga awanan ti otorisasyon ket naiget a maipawil.
Mabalballaagan met dagiti amin a maseknan nga establishimento a saan nga agibunong wenno aglako iti produkto tapno saan a sumango iti maiyannatop a pannusa.
