LAOAG CITY – Nangipaulog ti Food and Drug Administration (FDA) ti pagilian iti pakdaar kontra iti panaggatang ken panagusar iti saan a nairehistro nga agas a “Round Pink Coated Tablets” (50s).
Segun iti FDA advisory No. 2024-1015, saan pay a nagdalan ti nadakamat a produkto iti umno a proseso ti panagrehistro ken panangtingiting, isu a saan a masigurado ti kinatalged ken kinaepektibo daytoy.
Segun iti ahensia, ti panagusar kadagiti saan a nairehistro nga agas ket mabalin a mangpataud iti peggad iti salun-at ti publiko.
Mabalin nga addaan dagita a produkto iti saan nga umiso a doses wenno ingredients a mabalin a mangdadael iti salun-at dagiti agus-usar.
Gapu iti daytoy, nainget a binalakadan ti FDA ti publiko a saan a gumatang wenno agusar iti “Round Pink Coated Tablets” (50s) tapno maliklikan ti aniaman a posible a peggad.
Kabayatanna, agtultuloy ti panangipalagip ti FDA para iti kinatalged dagiti consumer a gumatang laeng kadagiti agas a nairehistro ken inaprobaran ti ahensia.
