LAOAG CITY – Pinakdaaran ti Food and Drug Administration (FDA) ti publiko kontra iti tallo a produkto ti sabon a mabalin a magatang iti merkado nga awan ti autorisasion a mailako.
Mainaig iti daytoy, binalakadan ti FDA ti publiko a liklikan ti gumatang iti “Fairy Skin Milky Bar Soap,” “Rosmar Gluta Peeling Soap,” ken “Rosmar Kagayaku Bubble Gum Soap.”
Segun iti ahensia, natakuatan dagiti nadakamat a produkto ket awan ti valid Certificate of Product Notification.
Gapu iti daytoy, saan nga irekomendar ti publiko nga agusar kadagiti nasao a produkto.
Inpapilit ti ahensia a saan a garantisado ti kalidad ken kinatalged dagiti produkto ken mabalin a mangpataud kadagiti rigso iti salun-at dagiti consumer.
Binallaaganna pay dagiti amin a maseknan nga establisimiento a saanda nga iwaras dagiti tallo a violative cosmetic products.
Kabayatanna, nagbilin ti FDA dagiti regional field offices ken regulatory enforcement units-na, kasta met dagiti law enforcement agencies ken local government units, tapno masigurado a saan a mailako wenno mausar dagiti napeggad a produkto.
