LAOAG CITY – Nangiparuk-at ti Food and Drug Administration (FDA) ti pagilian, iti napateg a pakdaar mainaig iti panagusar iti unnotified medical device a maawagan iti Disposable Chest Drainage Device.
Iti Food and Drug Administration Advisory No. 2024-1114, nagpakdaar ti ahensia iti publiko maniag iti panaggatang ken panangusar iti nadakamat a produkto nga awan ti opisial a pammalubos manipud iti ahensia.
Segun iti ahensia, saan pay a nasubok daytoy a Disposable Chest Drainage Device para iti kinatalged ken kinaepektibo, ken awan pay ti naited a lisensia para iti pannakaiwaras ken pannakausar daytoy iti pagilian.
Mainaig iti daytoy, ti panangusar kadagiti alikamen nga awan ti umiso a regulasion ken autorisasion ket mabalin a mangpataud kadagiti nakaro a peggad iti salun-at, agraman dagiti posible a komplikasion.
Nagpalagip ti ahensia iti publiko a saan a gumatang wenno agusar iti daytoy a produkto ken kanayon a siguraduen a dagiti medical equipments ket manipud kadagiti lehitimo a manufactures nga addaan iti umno a regulasion ken sertipikasion manipud iti Food and Drug Administration.
