LAOAG CITY – Sumango ti kaso a panagpanggep a panagipuslit ti rinibribo a dolyar babaen ti panagluganan na ti pribado nga eroplano ti pannakabagi ti maysa a relihiyon nga idiay Hawaii ngem nakabase ti nasao a relihiyon ditoy Pilipinas.
Segun ken ni Bombo International Correspondent Manny Pascua idiay Hawaii, ti Federal Grand Jury ti nasao nga isla ti nagirekumendar ti pannakaisaklang ni Felina Salinas, maysa a Business Executive ken residente idiay Waipahu, pasurot ni church leader Pastor Apolo Quiboloy.
Daytoy ket gapu ta a napaay ni Salinas a nangireport nga adda awit na a 335,00 US dolars ken 9,000 Australina Dollars idi adda iti eropuerto ti Honolulu idi Peberero iti daytoy a tawen 2018.
Maisaklang pay ni Salinas gapu iti maipagrup a panangtulong na ti Founder ti Relihiyon a nakaikappengan na tapno mailiklik ti pannakatiliw na.
Maipalagip nga inbaga dagiti inbestigador ti Homeland Security a ti indeklara laeng ni Salinas nga adda ikot na ket 40,000 US dolars ken Philippine peso a 1,000 dollars.
Mainaig iti daytoy inbatad ni Atty. Michael Green abogado ni Salinas a saan a nasurot ti umiso a proseso kasanguanan a napagsaludsudan daytoy idi matiliw.
