LAOAG CITY – Naglikudan ni Mr. Francisco Martin, ti Federated President ti Asosasyon dagiti traysikelan ditoy ciudad ti Laoag ti akusasyon nga adda ti naawat da a sag-1,100 a pisos manipod iti maysa a nangato nga opisyal ti gobierno ditoy ciudad.
Daytoy ti rumrumuar a rason a napan nagatendar dagiti presidente ti Tricycle Operators and Drivers’ Association (TODA) iti public hearing a naiwayat koma idi biernes, nobyembre 12 ita a tawen.
Matratar koma iti public hearing ti maad-adal a pannakaipababa ti multa dagiti aglabsing ti paglintegan iti trapiko no sadinno a manipod iti sangaribo a pisos ket mapagbalin a 500 a pisos.
Inpasingked ni Martin nga awan ti naaw-awat na a 1,100 a pisos manipod iti nangato nga opisyal ti gobierno ditoy ciudad.
Inpetteng na pay nga uray adda ti maawat da ket adda ti bukod da a panunot no rumbeng wenno saan nga agatendar da iti public hearing.
Inpalgak pay ni Martin a ti konseho ti nangipasa ti ordinansa para iti pannakaipangato ti multa isut gapuna a rumbeng laeng nga isuda met laeng ti mangwaswas iti daytoy.
Inbatad na a sakbay a naipangato ti multa ket napaayaban da manen para iti maiyuswat a public hearing ngem rumrumuar a sakbay pay iti dayta ket naaprubaran dan ti ordinansa para iti pannakaipangato ti multa dagiti aglabsing iti linteg trapiko.
Mamati ni Martin nga ar-aramiden laeng daytoy ti konseho ditoy ciudad gapu ta umasideg ti eleksyon.
Mainaig iti daytoy, inbagan Martin nga awan pay ti naawat na nga imbitasyon para iti pannakaiyuswat ti public hearing intono Nobyembre 27 ngem uray adda ti maawat na ket saan a makaatendar gapu ta agturong da iti anakna iti Metro Manila.
Innayon na nga adda kadagiti kakadwa na no mapan da agatendar wenno saan.
