LAOAG CITY – Inbinsabinsa ni Ms. Amie Go, maysa a Feng Shui Expert dagiti lucky charms ken pampaswerte ita a Chinese New Year.
Segun kenkuana, ita a tawen ket maaw-awagan a Year of the Fire Horse a maipapan iti passion ken determination a mangaramid ti napintas nga oras a mangipaay ti long-term plans wenno dagiti arapaap iti biag.
Inbatadna a dagiti kangrunaan nga ar-aramiden dagiti Tsino kagiddan iti panangrambak ti Chinese New Year ket agisagsaganada ti adu a taraon kas ti pancit a pangpaatiddog ti biag, naruay a nagduduma a klase ti prutas kas ti mansanas a mangisimsimbolo ti panagrang-ay ken dagiti nasam-it ken napigket a taraon a mangipaay ti naragsak ken panagkakadua ti pamilia.
Inlawlawagna a ti panagisuot ti nalabbaga a bado dagiti Tsino ket mapapati a mangiwarsi ti malas iti biag dagitoy idinto a ti panagbado ti agmaris ti nangisit ket mangipasimudaag ti naliday a mapasamak iti uneg ti maysa a tawen.
Kunana a tunggal madanon iti panangselebrar ti Chinese New Year ket maipawil ti panagdalus gapu ta adda dagiti saan a napintas a mapasamak, saan a mabalin ti agpapukis, maipawil ti agikuko ken dadduma pay.
Innayonna a ti nagasat a zodiac sign ita a Year of the Fire Horse ket dagiti naipasngay iti Year of the Tiger, Goat, Dog, Snake ken Pig.
