LAOAG CITY – Pormalen a nalukatan ti baro ken napapintas a Ferdinand Edralin Marcos Stadium ditoy siudad ti Laoag babaen ken ni Gob. Matthew Marcos Manotoc.
Segun kenkuana naisayangkat ti “blessing” iti nagdumaduma a pasilidad ti stadium ken kalpasan ti simple ken ababa a programa ket napasilawan ti stadium.
Immun-una ngem iti daytoy, pinasingkedan ni Provincial Engr. Luciano Domingo Jr. a maisayangkat ti inagurasyon kalpasan ti pannakaisayangkat ti inspeksion kadagiti nagdumaduma a pasilidad ti Stadium.
Inlawlawagna a gapu iti kaadu ti nakakumikuman ti gobernador ket pinusganna ida kada Mr. Faivo Bartolome nga sports consultant ti probinsia ken ni General Services Officer Mrs. Miriam Ranchez a nangisayangkat ti inspeksion.
Mainaig iti daytoy, impalgakna a ti laengen saan a nalpas ket ti “testing” wenno pannakaipadas ti aircon, fire pump ken ti jockey pump.
