LAOAG CITY – Nagbalin a Ghost Town ti Ferdinand Edralin Marcos Stadium ditoy ciudad ti Laoag sipud rinugian da ti agsingir ti entrance fee kadagiti indibidwal nga agkalikagum a sumrek iti pasdek.
Daytoy ti inrakurak ni Mayor Michael Marcos Keon apaman a naobserbaran na nga arigna awanen ti mapmapan iti stadium.
Inrakurakna a sipud idi nagbalin a Bokal ken Gobernador datoy iti Ilocos Norte ket saan na pulos a napanunot ti agsingir ti entrance fee ken sipapalubos latta daytoy a mausar.
Kunana, apaman a kastoy ti inaramid na ket nasurok sangagasut nga indibidwal ti agturturong iti nasao a pasdek tapno agay-ayam ti volleyball, basketball, sepak takraw, soccer ken dadduma pay a sports activity.
Mainaig iti daytoy, inpakaammu na nga adda ti naminsan nga panagturong ti football team iti Marcos Stadium ngem maipagarup a nabagaanda nga agbayad ti 2500 pesos iti kada oras.
Gapu iti daytoy, kwinestyunaran ti Mayor nu apay a kasapulan nga i-obligar iti maysa nga ubbing nga agbayad ti entrance fee.
Iti laksid nga isuna ti nangbukel iti Ilocos Norte Sports Council nga imatmatunan ita ni Mr. Faivo Bartolome, inpettengna a rumbeng a ma-abolish daytoy ken mangbwangay da laengen ti bukod da nga opisina gapu ta ti panggep na a nangbukel iti daytoy ket saanen nga isu ti mapaspasamak.
Iti agdama, kunana nga agsagsagana ti City Government para iti mapaspasangasangan a Region-I Athletic Association Meet (R1AA).
Maipalagip nga immunnan nga inpetteng ni Sang. Panlalawigan Member Franklin Respicio ti Chairman ti Committee on Ways and Means nga adda dagiti napaayaban a mangirepresentar ti City Government kabayatan ti naiwayat a public hearing seknan iti nasao a banag sakbay a napagbalin nga ordinansa ngem awan ti nagbalin a reaksiyon da a rason nu apay nga inpagarup da nga umanamong da iti nasao nga ordinansa.
