LAOAG CITY – Napaay a nakastrek iti top 16 ti pambato ti Pilipinas iti maika-71 a Miss Universe a ni Celeste Cortesi a naiyuswat idiay New Orleans, Louisiana.
Nu pay kasta, arig a saan a naatiw dagiti Pilipino gapu ta ti nakaala ti korona a ni Miiss USA R’Bonney Gabriel ket maysa a Filipino-american.
Iti rugi pay laeng ti prestihiyoso a pageant, nangipakitan ti napintas a performance ni Gabriel ken isu ti maika-14 a naiyawag ti nagan na ken nakastrek iti top 16.
Kabayatanna, napigsa a nakalaban ni USA kalpasan a simrek iti top 5 ti Venezuela, USA, Puerto Rico, Curacao ken Dominican Republic.
Nu pay kasta, apaman a nadanon ti final Question and answer portion para kadagiti nabatbati a tallo a kandidata a pakairamanan ni Miss USA ket saan a nagpaatiw iti sungbat daytoy.
Maymaysa ti nasaludsod kadagiti top 3 ken daytoy ket nu aniaman ti aramiden da nu a panangitandudo iti Miss Universe nu dagitoy ti makoronaan.
Kuna ni Gabriel nga usaren na daytoy kas maysa a transformational leader.
Inbatad na a kas maysa a nabayagen nga agpapaay kas fashion designer, karaman iti adbokasiya na ket ti makissayan ti pollution iti aglawlaw babaen iti panag-recycle na kadagiti nagduduma a gamit manipod iti basura ken usaren na kadagiti disenyo na.
Inpetteng na a babaen iti daytoy, napateg nga ag-invest iti bukod a komunidad kageddan ti panagipakita ti naiduduma a talento tapno makaaramid ti dakkel a panagbalbaliw.
Mainaig iti daytoy, nakoronaan kas second runner-up ni Miss Dominican Republic ti Andreína Martínez idinto a ni Miss Venezuela Amanda Dudamel ti first runner-up.
Ni miss USA ti kaunaan a Filipino-American a nakoronaan kas miss universe.
Kabayatanna, nu pay saan a nakastrek ti Cortesi iti Top 16 ti kompetisyon ken isu ti nangputed iti 12 a tawen a nagsasaruno a pannakastrek ti Pilipinas iti top finalists ket naruay a supporters na ken dagiti Pilipino idiay Estados Unidos ti nangdayaw iti nagbalin a performance na iti kadakkelan a pasalip para kadagiti babbai iti intero a lubong.
