LAOAG CITY – Nakasaganan ti Filipino Community idiay Belgium para iti pannakitaripnong da kenni Pres. Ferdinand Bongbong Marcos Jr. ken ti delegasyon daytoy.
Segun kenni Bombo International News Correspondent Anna Beth Santilla idiay Belgium, magagran dagtoy a makita iti personal ti presidente ken ado dagiti kalikagom da nga ipadanon kenkuana.
Inbatad na a karaman ditoyen ti kaadda ti natibtibker ken naig-iget pay a linteg para iti proteksyon ti kada Filipino worker.
Kunana nga iti dua a tawen na a panagbalin a volunteer iti kampanya Violence Against Women, ado dagiti madukdutalan da a kaso dagiti OFW a mamalmaltrato, saan laeng nga iti trabaho no diket iti pamilya wenno panagbalin nga asawa.
Mainaig iti daytoy, kunana nga umabot iti 1500 a tattao dagitiy agatendar no sadinno ket adda pay dagiti Filipino Community idiay Netherland, France ken Germany ken ti dress code da ket Filipiña outfit.
Naamoan a mangrugi ti registration iti alas-tres ti malem, oras idiay Belgium ken alas-sais met ti isasangpet ti Presidente no sadinno agpaot ti maysa nga oras ti pannakitaripnong na kadagiti OFWs.
Dinakamat na a saan a basta makastrek ti tao iti venue gapo ta masapol a nakaprehistro ken adda ti QR code para iti kinatalged da ken iti presidente.
