Inpasingked ni Mr. Elmer Blanco iti Vienna, Austria ken mangidadaulo iti Global Save Life Foundation a bukbuklen ti Filipino Community a balligi a naipaayan ti tulong dagiti kadaraan a Pilipino a naawanan ti trabaho idiay Dubai.
Inbatad ni Blanco a babaen ti pannakikoordinar na kadagiti Filipino a miembro ti Foundation nga adda iti Dubai, naipaayan ti tulong dagiti Overseas Filipino Workers a naawanan ti trabaho ken saan a makasubli ditoy pagilyan gapu iti pandemiya.
Kuna na a karaman kadagiti naipaay ket ti bagas, itlog, karne ti manok, noodles ken dadduma pay a taraon.
Inbunannag ni Blanco nga immunan nga adda ti dimmawat ti tulong kenkuana kalpasan a nabuya da iti Bombo Radyo ti maysa nga interview nu sadino a naipakaamo a tumultulong ti foundationda kadagiti agkasapulan.
Mainaig iti daytoy, inpagunam-gunam ni Blanco a nakasagana ti foundation a mangipaay ti tulong nangruna ita nga adda ti mapaspasaran a pandemiya.
Innayun na nga ado dagiti miembro ken saan a miembro ti foundation ti naayat a mangipapaay ti pisikal ken pinansyal a tulong.
Malaksid iti daytoy, inpakaamo ni Blanco a plano ti foundation a mangirugi ti fund raising activity para kadagiti dumaldalan iti dialysis ken dagiti adda ti leukemia na nga ubbing partikular sitoy Pilipinas.
Ti Global Save Life Foundation ket nabukel addan dua a tawen ti napalabas.
