LAOAG CITY – Rinugianen ti Commission on Elections ti final stage iti panangtingiting ti Automated Counting Machines a mausar inton May 12 elections kadagiti nagduduma a paset ti pagilian.
Sakbay ti eleksion, naikeddeng ti Mayo 2 agingga inton Mayo 7 iti panangisayangkat ti Final Testing Sealing dagiti miembro ti electoral board ti ‘end-to-end’ test dagiti makina.
Immuna a naiyuswat ti Final Testing Sealing iti Pateros Elementary School a malaksid kadagiti opisial ti poll body, naimatangan pay dagiti citizens arms, poll watchers, foreign observers ken dagiti agirakrakurak.
Kalpasan ti Final Testing Sealing ket maselyuan dagiti Automated Counting Machines ken maikabil dagitoy iti Office of the Department of Education Supervisor Official tapno bantayan ti Philippine National Police ken Armed Forces of the Philippines agingga iti aldaw ti eleksion.
Inbatad ni Commission on Elections Chairman George Erwin Garcia nga iti kanito oras a maiserrek ti smart card ti electoral board members ket ditoy nga agoperaren ti makina.
Naipakita a napateg a maipadalan pay laeng nga umuna ti makina iti initialization no sadinno a masapol a makairuar ti resibo a mangipakpakita awan ti karga wenno nagian a butos ti makina.
Naammoan nga apaman nga inserrek ti balota ket inawat ti makina ken awan met ti nakita nga aberya malaksid iti paper jam.
Inbatad ni Garcia nga al-alisto ti Final Testing Sealing itatta maidasig kadagiti napalabas nga eleksion gapu ta user friendly ti Automated Counting Machines.
