LAOAG CITY – Nagballigi dagiti otoridad a nangtiliw iti maysa a lalaki iti naisayangkat nga anti-illegal drug buy-bust operation iti ili ti Nueva Era.
Segun ken ni Police Capt. William Sotelo, ti chief of Police iti ili ti Nueva Era, ti subject ti operasyon ket agtawen ti 40, fish vendor drug surrenderree, ken residente iti Barangay Poblacion iti nasao nga ili.
Inbatad ni Sotelo a nakumpiskar manipod iti suspek ti 7 a sachet a naglaon ti maipagarop a shabu.
Kuna na a ti suspek ket miembro ti maysa a drug group iti ili ti Nueva Era ken naamoan da a ti pagal-alaan na ti iwarwaras na a maipawil a droga ket iti ili ti Badoc.
Innayon na a ti patien na a rason no apay nga ado latta dagiti mairamraman iti illegal nga aktibidad ket gapu iti kinarigat ti panagbiag no sadinno nga ibilang ti opisyal nga alisto daytoy a pangalaan ti kwarta dagiti maseknan.
Malaksid iti daytoy, kuna ni Sotelo a dakkel pay ti impluwensya dagiti barkada wenno pakikadkadwaan.
Nupay kasta, nagballaag ni Sotelo a saan da met nga agsardeng a mangisayangkat ti operasyon kontra kadagiti agiwarwaras ti illegal a droga iti ili ti Nueva Era.
Mainaig iti daytoy, inpakaammo ti chief of police a naipila dan ti kaso a panaglabsing ti Republic Act 9165 wenno Comprehensive Dangerous Drugs Act of 2002 kontra iti suspek.
Kabayatanna, inbutaktak ni Sotelo nga iti agdama ket adda pay ti uppat nga High Value Individual a monmonitoren da iti ili ti Nueva Era idinto a dagiti Street Level Individul ket sumuruk-kumurang a pito.
