LAOAG CITY – Nagkamang ni Mr. Pepe Damo ditoy Bombo Radyo Laoag kalpasan a pinaritan ti maysa nga utility iti Central Terminal a sumrek iti Comfort Room wenno CR.
Segun ken ni Damo, saanna a malappedan ti panagsakit ti buksitna ket dagus daytoy a nagturong iti Comfort Room para kadagiti babbai gapu ta nakarikep ken nabayagen a perdi ti CR para kadagiti lallaki.
Inbatadna nga iti panagturongna iti CR para kadagiti babbai ket dita a naranana ti maysa kadagiti agdaldalus a nabigbig a ni Chita Pascual.
Inlawlawagna nga adda ti panagsinnungbatda iti utility kabayatan nga adda dagitoy iti Comfort Room kas ti panangkwestyunar ti utility kenkuana ti nakasurat a naituding laeng a para kadagiti babbai ti napananna a CR.
Inadmitirna a gapu iti pungtotna ket nakaisawang daytoy ti dakes a sarita iti agdaldalus ti Comfort Room ken saanna met kayat nga agrugit lattan iti igid a paset ti lugar nangruna ket adu ti tao kadayta a gundaway.
Innayonna a nasakit ti nakemna ti napasamak kenkuana rason a kiniddawna kadagiti adda iti turay iti lokal a gobierno ditoy Siudad ti Laoag a matarimaan ti Comfort Room para kadagiti lallaki iti kabiitan a panawen tapno saandan a mapabainan pay a mapan iti CR para kadagiti babbai.
Kabayatanna, Sinungbatan dagiti utility personnel iti Central Terminal iti reklamo a naipadanon iti Bombo Radyo Laoag a panakaipawil iti maysa nga indibidwal a mausar iti Comfort Room.
Inpakaammo ti utility personnel nga apaman a nagreport idi bigat kalman ket sigud a nagturong iti Female Comfort Room tapno alaen iti gamit na nga agdalos.
Apaman a nakadanon ket ditoyna a nakita a puro lallaki metten iti sumsumrek iti Comfort Room a naituding kadagiti babbai partikular dagiti vendors ti ikan iti nasao a lugar.
Gapo iti daytoy, naisawang iti personnel kadagiti lallaki a saan a rumbeng a ditoy iti papananda gapo ta daytoy ket Female Comfort Room.
Kunana a apaman a naibagana dagitoy a balikas ket simmungbat ti maysa a lalaki nu sadinno a maipagarup a kweskwestyunaranna nu sadinno a lugar ngarud iti pangikabilanda kadagiti rugitda.
Mainaig iti daytoy, segun kadagiti utility personnel, mapaspasamak daytoyen a sitwasyon kalpasan a naabuso iti comfort room a para kadagiti lallaki.
Inbatad da nga idi umun-una, ket napintas iti comfort room a para kadagiti lallaki ngem apaman a nagtulid iti panawen ket ditoy metten a maipagarup a main-inot a maperperdi dagiti tubo ken gripo.
Kinuna da pay nga addan dagiti gundaway a mismo nga iwara da ti rugit da iti datar ti kasilyas, iwara da ti pappapel a pangdalos ti bagbagi da, mapunpuno ti tissue iti cubicle nga isunto metten iti rason iti pagbaraduan iti nasao a CR. Kunada nga irepreport da daytoy iti city government ken adda dagiti kameng ti GSO wenno General Services Office a mapan mangtartarimaan ngem kasla awan iti serserbi na gapo ta nu matarimaan ket ditoy da manen a rugyanan iti mangperdi ken mang-abuso iti mangusar.
