LAOAG CITY – Manamnama a mairugi a maipasdek ita a lawas ti “fishery cold storage with ice plant’ iti sakop ti Ilocos Norte Agriculture and Fisheries Extension Center.
Inbatad ni Engr. Maria Teresa Bacnat, Officer In-charge ti Provincial Agriculture Office a mismo a ti contractor ti nangipasingked iti daytoy a banag kalpasan ti panangbisitana iti lugar a manamnama a pakaiyestablisaran ti nasao a pasilidad.
Kunana nga inpakaammo ti contractor nga iti mabiit ket mabunagen dagiti masapol a kagamitan ken dagiti dadduma pay a masapsapol para iti pannakairugi ti proyekto.
Immun-una ngem iti daytoy, nairakurak a mapundoan ti nasao a proyekto iti tallopulo a milyon a pisos.
Maipalagip a napundoan daytoy a proyekto manipud iti Philippine Fishery Development Authority.
Namnamaen ni Bacnat nga apaman a mairugi ti proyekto ket agtultuloy agingga a malpas a patienna a dakkel a tulong iti pannakaipadur-as ti panagbiag dagiti mangngalap ditoy probinsia.
