LAOAG CITY – Naragsak nga inpakaammo ni Mr. Xavier Ruiz, Officer In Charge ti Ilocos Norte Tourism Office a naiget nga itantandudu ti opisinada ti Flight Connectivity.
Segun kenkuana, adda ti naiyuswat a flight meeting-da iti Department of Tourism iti napalabas a lawas no sadino a napanunumoanda dagiti posible a baro ken sumaruno a flights ti Laoag International Airport.
Inbatadna a kalikagum ni Gov. Matthew Marcos Manotoc a maipangpangruna dagiti traditional flights ti probinsia kas ti Honolulu-Laoag flight pakairamanan ti Taiwan, Hong Kong, Korea ken Japan.
Inlawlawagna a makumikumda iti agdama para iti panagsagsagana kadagiti infrastructure programs ti Provincial Tourism Office nangruna ket adda ti epekto iti panawen ti panagtutudo iti benneg ti turismo.
Kunana nga iti baet ti agdama a paniempo ket naiget a nakatutok ita ti opisinada iti biang ti eco tourism ken heritage tapno ad-adda pay a magutigut dagiti turista ken gangganaet nga agpasiar kadagiti maipanpannakkel a tourist destination ditoy probinsia.
Kabayatanna, kuna ni Ruiz a nasuspinde ti pagannurutan ti Laoag-Cebu flight no sadino adda ti nagbalin a parikot maipapan iti pannakaipatungpal iti daytoy a nangitunda ti panagngudona idi Hunio 14.
Nupay kasta, saanna nga ilaksid nga adda pay ti posibilidad nga agsubli daytoy a flight iti masangoanan ditoy probinsia nangruna ket nagbalin met a napintas ti patakaran iti daytoy.
