LAOAG CITY – Inpakaammo ni Bombo International News Correspondent Kai Marie Barroga manipod idiay Dubai a nagsublin dagiti flights ken serrek dagiti klase ken opisina kalpasan ti agarup tallo nga aldaw a dimmuprak ti napigsa a tudo iti nasao a pagilian.
Nupay kasta, nangiyuswat ti gobierno ken sumagmamano a pribado a sektor ti work from home gapu ta adda pay laeng dagiti manarimaan a matartarimaan a public transportation system kalpasan a sinerrek ti danum gapu iti nakaro a layus.
Inbatadna nga iti baet a simmingisingen ti init idiay Dubai ket saan pay a naminpinsan a nages-es ti layus kadagiti kalsada ken pagtaengan rason nga adda pay laeng dagiti sumagmamano a nagtalinaed kadagiti evacuation centers.
Inlawlawagna a nagpukaw ti suplay ti kuriente gapu iti kinapigsa buyat ti tudo ken saplit ti angin a napasaranda ngem in-inut met laeng a nagsubli apaman a simmayaaten ti sasaaden ti panawen.
Innayonna nga adda dagiti na-stranded a pasahero kadagiti train station iti kangitingitan ti napigsa a tudo.
Immuna iti daytoy, kunana nga adda ti inparuk-at a Public Advisory manipod iti gobierno idiay Dubai maipanggep iti iduduprak ti napigsa a tudo.
