LAOAG CITY – Mangrugin intono Mayo 22 ti Manila-Laoag flight ken Laoag-Manila flight ti Cebu Pacific Air iti Laoag International Airport (LIA) ditoy ciudad ti Laoag.
Segun ken ni Mr. Perry Martinez, general manager ti Metro Ilocos Norte Council wenno MINC, daytoy ti bunga dagiti ar-aramiden ni Gob. Matthew Marcos Manotoc tapno manayunan dagiti flights iti Laoag International Airport.
Inlawlawagna a mismo a ti gobernador ti timmulong iti nadakamat nga airline company a nangkumpleto kadagiti kasapulanda tapno makaoperar da iti nasao nga erupuerto.
Impalgakna a mamati ti gobernador a no ad-ado dagiti flights nga agdisso iti erupuerto ket al-alisto ti mangallukoy kadagiti agpupuunan nga umay mangipasdek ti negosioda ditoy probinsia.
Malaksid iti daytoy, umad-ado dagiti turista nga umay bumisita ditoy probinsya gapu ta ado dagiti pagpilyan da a pagluganan.
Inpakaammo ni Martinez inaldaw nga adda ti dua a flights iti Laoag International Airport malaksid iti aldaw ti domingo a maaddaan ti tallo a flights.
Inlawlawagna a ti Cebu Pacific Air ket mabigbig a mangididiaya ti “low budget fair”.
