LAOAG CITY – Mamati ni PBGen Lou Evangelista, Regional Director ti Police Regional Office 1 a posible nga inbellengda laeng iti baybay dagiti floating shabu a nakita dagiti mangngalap iti rehion uno.
Inbatadna a mabalin nga adda ti recipient wenno pakaitedan dagiti naala a floating shabu iti kabaybayan.
Inlawlawagna a gapu kadagiti naruay nga aktibidad a maisaysayangkat iti paset ti West Philippine Sea babaen kadagiti law enforcement nangruna kadagiti kameng ti Armed Forces of the Philippines, Philippine Navy ken Philippine Coast Guard ket posible a nagbuteng dagiti adda iti likudan dagiti nakita a floating shabu.
Maipalagip nga insuko dagiti concerned citizen ken dua a mangngalap ti agarup 20.4 milyon a pisos a balor ti maatap a shabu nga agtatapaw iti kabaybayan ditoy probinsia.
Immuna iti daytoy, nakita dagitoy nga agtatapaw iti kabaybayan iti paset ti Barangay Pangil iti ili ti Currimao; Barangay 33-A, La Paz ditoy siudad ti Laoag ken Barangay Masintoc iti ili ti Paoay.
