LAOAG CITY – Kinumpirmaran ni Barangay Chairman Willie Biernes iti Barangay Darupidip, Pasuquin, Ilocos Norte a saan pay a nalpas ti Flood Control Project a napondoan ti 25 milyon a pisos iti barangay da.
Inlawlawag na a ti kaamak da ket adda ti dua a balay iti asideg ti nasao a proyekto a dandanin matennag kalpasan a nadadael ti flood control project.
Kuna na a maysa laeng a metro ti kaadayo na dagiti dua a balay manipod iti nasao a proyekto.
Segun ken ni Biernes, nangrugi pay laeng ti proyekto idi Pebrero 2018 ngem idi bolan ti marso ita a tawen ket bigla lattan a naisardeng iti saanna a masinunuo a rason.
Inbatad na pay a saanna nga ammo no kaanu a maileppas ti proyekto gapu ta saanna pay a nakitkita ken nakasarsarita ti contractor.
Innayon na a napanda metten inreport daytoy iti Department of Public Works and Highways wenno DPWH ngem mapan laeng kitaen dagiti maseknan gapu ta awan met ti aksyon da.
