LAOAG CITY – Agtultuloy ti imbestigasyon ti PNP-Sinait mainaig iti panagdinnungpar ti maysa a Florida Bus ken Innova iti paset ti Sinait, Ilocos Sur.
Daytoy ti inbatad ni Police Executive Master Sergeant Frazier Simbe, ti deputy chief of police iti PNP-Sinait.
Segun ken ni Simbe, iti inisyal nga imbestigasyon da ket adda iti laud ti highway ti Innova nga inturong ni Rogelio Tales, 58, taga Vigan City idinto nga adda met iti daya ti highway ti bus nga inmaneho met ni Elmer Calaro, 57, naasawaan, ken residente iti Novaliches, Quezon City.
Inlawlawag ni Simbe nga iti iseserrek dagiti dua a lugan iti highway ket ditoyen a nagdinnungpar da a nakabuungan ti windshield ti bus idinto a nakuppit met ti sango ken akin-kannawan a paset ti Innova.
Naamoan nga aggapo ditoy ciudad ti Laoag ti bus ken agturong koma idiay Metro Manila idi napasamak ti insidente.
Nakumpirmaran met a ti driver ti Innova ket aggapo iti maysa a paggiinuman iti Barangay Purac iti ili ti Sinait ken iti pannaka-eksamen na ket nagpositibo daytoy ti nasanger.
Gapu iti napasamak, inpakaammo ni Simbe a tinicket’an da ti driver ti bus gapu ta naamoan da a napaspas ti panagpataray na idinto a inisyoan da met ti ticket ti driver ti Innova gapu ti panagmaneho na a nakainom ti arak.
