LAOAG CITY – Nagballaag ti Food and Drug Administration (FDA) iti publiko kontra kadagiti peke a Paracetamol 500 mg tablets a magatang kadagiti lokal a pagtagilakoan.
Basar iti Advisory No. 2024-1013 ti ahensya, pinalagipan na dagiti amin nga healthcare professionals ken publiko mainaig iti presensya ti nasao a peke a produkto.
Binalakadan pay ti Food and Drug Administration ti publiko kontra iti panaggatang ken panagusar ti peke bersyon ti nasao a produkto.
Inpaganetget ti Food and Drug Administration a ti lot number, capsule, knurling, ken print appearance dagiti peke a tablet ket saan a maikompara kadagiti standard a feature ti rehistrado a produkto.
Inpetteng ti ahensya a dagiti peke produkto ket mangitunda ti possible a risgo iti salun-at dagiti aggatang.
Binallaagan pay ti ahensya ti amin nga establisimiento ken dagiti outlet kontra iti panaglako ken panagiwaras iti peke a produkto gapu ta mabalin a mapatawan dagitoy ti pannusa.
