LAOAG CITY – Inburay ni Mr. Robertson Belen nga agtagikua iti Food Cartel ti naggapoanan ti negosioda.
Segun kenkuana, rinugiananna ti nasao a negosio idiay siudad ti Baguio agingga a dimmakkel daytoy no sadinno adda pay ti branch-da idiay San Fernando ken San Juan, La Union, idiay siudad ti Vigan ken ditoy siudad ti Laoag.
Inbatadna a kaduana ti asawana iti panangpataray iti negosioda ken kalikagumda a maitandudo dagiti nagduduma a klase ti luto ti taraon.
Kunana a dakkel a tulong ti inturposna a kurso idi kolehio gapu ta maiyap-aplikarna dagitoy iti negosioda.
Inlawlawagna a dagiti empleadoda a nagserbi kadakuada iti naunday a panawen ket isu ita ti pinusganda ken pinagtalkanda a mangidaulo kadagiti dadduma pay a branch-da.
Mainaig iti daytoy, inpakaammo ni Belen a naggapu ti nagan ti negosioda a Food Cartel gapu ta kaadduan kadagiti ididiayada a taraon ken maiyarngi kadagiti Mexican foods.
Innayonna a ti kangrunaan a birbiroken dagiti kostumerda ket ti ipanpannakkelda a sea foods nga isu ti alisto a maibos iti puestoda.
Kabayatanna, kunana a para kadagiti adda ti arapaapna a mangipasdek ti negosio ket saan nga agbuteng ken agpangadua a sumrek iti negosio gapu ta gagangay laeng a mangrugi iti bassit agingga a magun-od ti nasam-it a balligi.
