LAOAG CITY – Nabirngasan ni football star Cristiano Ronaldo nga highest paid athlete ti 2024.
Basar iti datos ti Sportico, adda ti $260 milyon daytoy a birok ngem iti nasao a listaan ket awan dagiti babbai nga atleta a nakastrek iti Top 100.
Naggapu ti pakabuklan a birok daytoy manipud iti $215-M a sueldo ken panangabak iti Al-Nassr idiay Saudi Arabia ken idiay Portugal national team.
Adda pay ti birok daytoy manipud iti on-field endorsement nga agbalor ti $45-M.
Iti napalabas a tawen ket isuna ti umuna a tao a nakagun-od ti 900 career goals ken sipod idi immakar iti Saudi Arabia ket nakaaramid ti 82 goals iti 90 nga ay-ayam.
Naammoan a maikadua met iti listaan ni NBA star Stephen Curry nga adda ti mapatta-patta a $153.8 milyon a birok no sadinno $53.8-M ket manipud iti sueldo wenno winnings idinto a ti $100-M ket manipud kadagiti endorsements.
Adda iti maikatlo a puesto ni British boxer Tyson Fury nga adda ti mapatta-patta a birok a $147-m no sadinno $140-M manipud iti sueldo wenno winnings ken $7-M met iti endorsements.
Maikapat iti puesto ni Lionel Messi nga adda ti $135-M a mapatta-patta a birok no sadinno $60-M ditoy ket manipud iti sueldo wenno winnings ken $75-M kadagiti endorsement.
Maikalima iti puesto ni Los Angeles Lakers star LeBron James nga adda ti mapatta-patta a $133-M no sadinno $48.2-M ditoy ket manipud iti sueldo wenno winnings ken $85-M iti endorsement.
Kabayatanna, indauloan met ni Dallas Cowboys quarterback Dak Prescott iti highest earning player ti NFL nga adda iti maika-12 a puesto nga adda ti birokna a $100.4-M.
