LAOAG CITY – Ibilang ni Coach Tomasito Glenn Ramos iti Central Visayas a napintas ti panagay-ayam ti team da iti umuna a laban da kontra iti Western Visayas kalpasan a nagballigi dagitoy iti iskor a 3-1.
Mangnamnama nga agtultuloy ti napintas a performance dagiti atleta na agingga a malpas ti laban da iti Palarong Pambansa 2025.
Segun ken ni Ramos, isuda ti kampeon idi 2023 isut gapuna a mangnamnama a magun-od da ti kampeonato ita a tawen.
Inpakaammo na a maiyuswat ti maikadwa a laban da ita a bigat ken mangnamnama nga agpannuray manen ti kinalaing dagiti atleta da.
Kabayatanna, arigna nagbalin met a celebrity ti maysa kadagiti football player a ni Jared Lim Almendras no sadinno a maibilang daytoy kas Crowd Sensation gapu iti kaado dagiti mayat a makipicture kenkuana.
Inpakaammo ni Almendras a dua a bolan a tinutukan da ti nagsanay no sadinno a bigat ken malem ti schedule da.
Kuna na a deserved da ti nangabak gapu iti naiget a panagtrabaho da tapno agballigi ti team da iti umuna a laban da.
Innayon na a dakkel met a karit para kadakuada iti pannakisango da iti National Capital Region gapu ta isuda ti nagkampeon iti napalabas a tawen, ngem isu ti pangtimbangan da ti kabaelan da para iti ay-ayam a football.
Ni Almendras ket addan 10 a tawen nga agay-ayam ti football no sadinno a rinugyan na idi Grade 4, ken daytoyen ti maudi a pannakilaban na gapu ta agturpos ton iti Junior High School.