LAOAG CITY – Ngimmato iti 16-month high ti gross international reserves (GIR) ti Pilipinas idi Enero 2026.
Resulta daytoy ti panagngato ti balor ti gold reserves ti Bangko Sentral ng Pilipinas (BSP) ken pannakaiserrek ti pondo manipod iti offshore bond sale ti administrasyon Marcos.
Basar iti datos ti Bangko Sentral ng Pilipinas, umabot iti $112.5 bilyon ti gross international reserves ti pagilian, nangatngato ti 9% no ikumpara iti napalabas a tawen ken nangatngato manipod idi Setyembre 2024.
Naartapan na pay ti target ti Bangko Sentral ng Pilipinas a $110 bilyon para iti sibubukel a 2026.
Gapu iti daytoy, umaboten iti nasurok a 18% ti pakabuklan ti reserves ti paset ti balitok manipod iti 11% iti napalabas a tawen.
Inpasingked ni Bangko Sentral ng Pilipinas Governor Eli Remolona Jr., agtultuloy ti panangpatalinaed ti bangko sentral ti maysa a well-diversified reserve portfolio ken aglako laeng ti balitok no agbalin a sobra ti kadakkel ti paset ti pakabuklan nga assets.
