LAOAG CITY – Agdagup iti 69 a foreign sex offenders ti na-banned ditoy pagilyan manipud idi bulan ti Enero agingga iti Hunio ita a tawen.
Daytoy ti inpaka-ammu ti Bureau of Immigration, no sadinno a kinunada nababbaba daytoy ngem iti 84 a ganggannaet a nairekord iti isu met laeng a panawen idi tawen 2023.
Manipud iti 69 a ganggannaet, kinuna ti bureau a 58 ti rehistrado a sex offenders wenno “persons with record of convictions for sex crimes” iti bukodda a pagilian.
Kabayatanna, dagiti dadduma ket subjects of pending complaints wenno maimbestigaran ken manamnama a maidarum gapu iti nagduduma a sex offenses.
Innayon pay ti ahensya a dagiti American citizens ti kangrunaan nga adda iti listaan gapu kadagiti seksual a krimen da.
Iti kauduian a datus, 48 nga Americano ti naimaldit, uppat a Briton ken dua nga Australian citizen, karaman pay iti listaan ket German national, Indonesian, British national, ken maysa pay manipu Papua New Guinea.
Rinugyan metten ti Bureau of Immigration idi Enero ti kampania a mangsalaknib kadagiti ubbing manipud kadagiti seksual nga aramid.
Indagadag pay ti Council for the Welfare of Children kadagiti nagannak a liklikanda ti mangipost kadagiti ladawan dagiti annakda iti online gapu ta mabalin nga usaren dagiti sexual online predators para iti naalas nga online content iti babaen ti artificial intelligence.
