LAOAG CITY – Inpakaammo ni Fire Superintendent Roxanne Parado, ti Provincial Fire Marshal ditoy Ilocos Norte a ti kangrunaan a nairekord a napasamak nga uram ditoy probinsia ket forest fire.
Segun kenkuana, adda ti nairekord iti Bureu Fire Protection ditoy probinsia ket siam a fire incident iti uneg laeng ti maysa a lawas.
Kunana a napasamak dagitoy nga insidente idi Pebrero 26 agingga ita nga aldaw.
Gapu iti daytoy, inbatadna nga adda dagiti isaysayangkatda nga aktibidad tapno maliklikan ti uram kagiddan iti panagobserbar ti Fire Prevention Month.
Inlawlawagna nga adda dagiti maiyuswat a road show no sadino ditoy a maipakita dagiti kabaelan dagiti kameng ti Bureau of Fire Protection nga agpatingga inton Mierkoles.
Innayonna iti panangpalagip manen kadagiti umili iti naiget a panagan-annad iti panagusar kadagiti gadgets wenno appliances tapno maliklikan dagiti pamunganayan ti uram.
