LAOAG CITY – Kinumpirmaran ni Police Staff Sergeant Marawi Torda, ti imbestigador iti PNP idiay ili ti Pasuquin ti pannakaidungpar ti maysa a forward truck iti alad ti maysa a balay idiay Barangay Poblacion ti nasao nga ili.
Binigbig ni Torda ti driver ti truck a ni Ian Montanes, taga Bauang, La Union.
Segun ken ni Torda, ti truck ket nagkarga kadagiti tiles ken mapan koma ideliver ni Montanes idiay Cagayan idi kellaat a saanna maiturong ti manibela a nangitunda ti pannakaidungpar na iti alad ti maysa a balay.
Inpakammo ni Torda a ti laeng caretaker ti balay ti adda gapu ta dagiti akin-balay ket adda da idiay abroad.
Gapu ti daytoy, kiniddaw laeng ti caretaker a patarimaan ni Montano ti alad ti balay nga inanamongan a dagus ti driver ti truck.
