LAOAG CITY – Inlawlawag ni Atty. Bryan Corpuz, ti dean ti College of Law iti Mariano Marcos State University ti four-day work scheme a mangrugi a maipatungpal intuno lunes, Hunyo 27.
Kuna ni Corpuz a ti nasao a work scheme ket masurot kas nailanad iti Resolution No. 2200209 nga inyetnag ti Civil Service Commission.
Segun ken ni Corpuz, sumagmamano kadagiti rason a maipatungpal ti nasao a work arrangement ket iti panaggegeddan a panagrigat iti suplay ti enerhiya ken gasolina kasta met nangina a bayad dagitoy.
Kuna ni Corpuz a babaen iti four-day work scheme ket lunes agingga iti huwebes ti klase iti unibersidad.
Inbatad na a daytoy ket mangrugi iti alas siete ti bigat agingga iti alas sais ti rabii.
Inlawlawag na nga awan ti klase iti biernes ken sabado malaksid iti College of Law, College of Medicine ken graduate school.
Mainaig iti daytoy, kuna ni Corpuz nga iti administrative offices, tunggal shift ti panagtrabaho dagiti empleado gapu ta masapol latta a silulukat ti unibersidad iti inaldaw.
Kabayatanna, inpakaammo ni Corpuz a posible a maiysuwat commencement exercises ti unibersidad intuno Hulyo 15 ken manamnama a guest of honor and speaker ni Dr. Arsenio Balisacan, ti sumaruno a mangidaulo iti National Economic and Development Authority.
