LAOAG CITY – Inakusaran ti prosecution ti International Criminal Court (ICC) ni dati a Presidente Rodrigo Duterte nga inusar na ti maibilang a Davao model tapno maipatungpal ti nalawa a pammapatay iti Pilipinas idi daytoy ket naipatugaw iti pwesto.
Iti manipestasyon ni International Criminal Court Trial Lawyer Edward Jeremy, inpetteng na a tinungpal laeng ti dati a presidente ti nagbalin a karina idi panawen ti kampanya.
Nakasentro daytoy a paset kadagiti maipagarop a panangpatay kdagiti maibilang kas high-value targets a karaman iti kontrobersyal a narco list ti napalabas nga administrasyon.
Pormal met nga inpresentar ti prosecution team ti International Criminal Court (ICC) ti command memorandum ti kontrobersyal a war on drugs kas paset ti panagdengngeg iti kaso a crimes against humanity kontra ken ni dati a Presidente Rodrigo Duterte.
Iti agtultuloy a panangisumitir kadagiti ebidensya ken merits ti kaso, indatag ni ICC trial lawyer Edward Jeremy iti sangwanan ti Pre-Trial Chamber I ti dokumento a mabigbig kas Project Double Barrel.
Ti Project Double Barrel ket nagbalin nga opisyal a pagannurutan ti nailian a pulisya iti pannakaipatungpal ti nadara a kampanya kontra illegal a droga ti napalabas nga administrasyon.
Daytoy ket us-usaren iti agdama ti ICC prosecution kas maysa a napateg a dokumento tapno paneknekan ti maipagarop a sistematiko a pagannurutan ti pammapatay a nagresulta ti pannakatay ti rinibo nga indibidual iti Pilipinas.
