LAOAG CITY – Pormalen a nagsapata ken ni Presidente Ferdinand Marcos Jr. ni dati a Senador Francis Tolentino kas baro a sekretaryo ti Department of Labor and Employment (DOLE).
Sinukatan ni Secretary Bienvenido Laguesma, a nagikkat iti puwesto gapu iti salun-at na kalpasan a nagserbi manipod 2022 agingga iti 2026.
Ni Tolentino ket maysa nga abogado ken dati a Senate Majority Leader a nagserbi iti Senado manipod 2019 agingga 2025.
Sakbay ti karera na iti lehislatura, immuna a nagserbi kas chairperson ti Metropolitan Manila Development Authority (MMDA) ken nabigbig iti papel na iti disaster preparedness ken urban management.
Kabayatanna, ni Laguesma ket maysa a beterano nga opisyal a nangrugi iti Department of Labor and Employment (DOLE) idi dekada 1970 kas labor arbiter.
Nagserbi kas sekretaryo ti Department of Labor and Employment (DOLE) iti babaen ni dati a Presidente Joseph Estrada manipod 1998 agingga iti 2001, ken nagsubli iti isu metlaeng posisyon iti administrasyon ni Presidente Marcos Jr. idi 2022.
Nagserbi pay ni Laguesma kas commissioner ti Social Security System (SSS) manipod 2011 agingga iti 2016.
Ti appointment ni Tolentino ket dimteng iti baet dagiti karit iti sektor ti panagtrabaho, karaman ti nangato a presyo dagiti magatgatang, wage adjustments, proteksyon dagiti mangmangged ken labor migration.
