LAOAG CITY – Aprobado iti maikadua a pannakaibasa iti Kamara de Representantes ti gakat a mangipaay ti libre a licensure ken civil service examinations para kadagiti kualipikado nga indigent ken dagiti miembro ti Indigenous Peoples (IPs).
Ti House Bill (HB) No. 8869 wenno ti Free Professional Examinations Act ket inlungalong ti House leadership iti panangidaulo da House Speaker Faustino Dy ken House Majority Leader Sandro Marcos.
Gagem ti gakat nga ikkaten ti pinansial a manglapped para kadagiti marigrigat a Pilipino a kalikagum a mangala ti lisensia wenno agtrabaho iti gobierno.
Iti babaen ti nasao a gakat, saanen a pabayadan ti examination fees dagiti kualipikado nga aplikante kadagiti eksaminasion nga imatmatonan ti Professional Regulation Commission (PRC) para kadagiti board exam dagiti mangisursuro, nurse, engineer ken dadduma pay a Civil Service Commission (CSC) para kadagiti agkalikagum a sumrek iti government service.
Naammoan a tapno agbalin a benepisiario, kasapulan a mangipakita ti aplikante ti aniaman kadagiti sumaganad a dokumento kas ti Certificate of Indigency manipud iti lokal a gobierno (LGU) ken Certification manipud iti National Commission on Indigenous Peoples (NCIP).
Mabalin laeng nga i-avail ti libre nga exam ti maminsan a daras iti uneg ti maysa a tawen ti tunggal kualipikado nga indibidual.
