LAOAG CITY – Naragsak nga inpakaammo ni Engr. Neil Jose, ti Former National President iti Pugad Lawin a mangidiayada ti free ride wenno libre a panaglugan kadagiti deboto nga awan ti luganna para iti Visita Iglesia inton bigat, aldaw ti Huebes Santo.
Segun ken ni Jose, naobserbaranda nga adu dagiti tattao ti marigrigatan tunggal madanon ti Visita Iglesia dahil gapu ta awan ti pagluganan dagitoy.
Inbatadna nga adda ti dua a bus ti Pugad Lawin ti mausar a pagluganan dagiti deboto nga agpasiar kadagiti pito a simbaan.
Kunana a ti kada simbaan a pagpasiaranda ket maikkan laeng ti 15 a minuto dagitoy gapu ta agaadayo dagiti simbaan a pagturunganda.
Inlawlawagna nga alas siete ti bigat ti call-time iti sango ti Kapitolio Probinsial ti Ilocos Norte kadagiti aglugan iti bus ken no bilang adda dagiti sumagmamano a saan a maakomodar ket adda ti maiyuswat a second trip iti malem.
Naammoan a karaman kadagiti simbaan a bisitaenda ket ti Mangato Church, Paoay Church, Currimao Church, Badoc Church, Sinait Church, Batac Church ken ti San Nicolas Church.
Mainaig iti daytoy, malaksid iti maidiaya a free ride ket mangipaay pay ti grupo ti danom ken makan para kadagiti deboto.
Kabayatanna, kuna ni Jose a saan daytoy ti umuna a gundaway nga adda ti free ride gapu ta mismo a pamilia daytoy ti mangididiaya tunggal Visita Iglesia.
