LAOAG CITY – Nakagun-od ti world record ni André Belibi Eloumou ti France para iti Guinness World Record title a “longest duration full body contact with ice (male)” kalpasan a nagtalinaed daytoy ti sumurok uppat nga oras iti maysa nga ice bath.
Inaramidna ti pananggandatna iti Servus Calgary Marathon Runners’ Expo idiay Canada kas suporta iti Autism Canada. Daytoy ket sagutna iti anakna a ni Kira nga addaan ti autism spectrum.
Iti baet ti pangta ti napigsa a bagyo ken kimat, saan a nagpaatiw ni André ken intuloyna ti karit a sinaganaanna a naimbag iti uneg ti sumurok uppat nga oras.
Naammoan a kas maysa nga extreme athlete ken mindset coach, sanay ni André iti nadagsen a pannubok para iti naisangsangayan a gagem.
Idi 2020, timmaray pay isuna iti 4,500 kilometres iti intero nga Estados Unidos tapno suportaran ti UNHCR kas pananglagip iti mapaspasaran ti amana manipud iti Cameroon nga agturong idiay France.
Para ken ni André, ti tunggal pannubok ket pammaneknek iti husto a disiplina ken kalikagum, kabaelan nga artapan ti aniaman a limitasion.
