LAOAG CITY – Dinutokan ni French President Emmanuel Macron ni Michel Barnier kas Prime Minister, agarup dua a bulan kalpasan a naglippas ti snap election ti France iti political deadlock.
Ni Barnier ket dati a chief Brexit negotiator ti European Union ken indauluanna ti saritaan iti gobierno ti United Kingdom idi 2016 agingga 2019.
Isuna ket maysa a beterano ti right-wing republicans (LR) party ken addaan iti napaut a political career ken nagakem ti nagduduma a nangato a puesto idiay France ken iti European Union.
Segun ken Barnier, kalikagom na ti mangbukel iti gobierno a mangipangpangruna ken mangital-o iti National Assembly a nabingay iti tallo a dadakkel a political bloc, no sadinno nga inpasigurado na a daytoy a mabukel ket awan ti siasinnoma a makadadael.
Kinuna ni Barnier a kalikagomna nga ikompanya ni Macron kas Presidente iti France, ngem napaay a napili a kas kandidato babaen ti partidona.
Mainaig iti daytoy, ni Barnier ti kalakayan a Prime Minister ti France sipud idi Fifth Republic idi 1958.
Isuna ket naikeddeng a mangsukat kenni Gabriel Attal nga isu iti kaubingan a Prime Minister ti France, nga immuna a dinutokan ni President Macron ita a tawen ken nagtalinaed iti puesto a kas caretaker manipud idi bulan ti Hulio.
