LAOAG CITY – Inrakurak ni French President Emmanuel Macron nga iwaragawag na ti baro a prime minister kadagiti sumarsaruno nga aldaw kalpasan a nagresign ni Michel Barnier gapu iti no-confidence vote iti parliamento.
Iti panagbitla ni Macron a nagpaot ti 10 a minute, saanna nga inawat ti panangpres-pressure kenkuana ti oposisyon a bumaba metten iti pwesto na.
Inpetteng na nga agtalinaed iti pwesto na agingga a malpas ti termino na iti panagngudo ti 2027.
Kabayatanna, nagyaman ni Macron iti dedikasyon ni Barnier iti trabaho na iti apagbiit a panagtugaw na kas prime minister ti pagilyan da, kagiddan ti panangakusar na ti French far right iti pannakikunsabo da iti “anti-republican front” tapno bumagsak ti gobierno na.
