LAOAG CITY – Inpakaamo ni Ms. Edna Orcino ti Administrator ti Philippine Redcross-Ilocos Norte Chapter a dagiti freshly collected blood ti kasapulan a maipaay kadagiti indibidwal a positibo ti dengue.
Daytoy ti inrakurakna kalpasan nga agtultuloy ti panagngato ti kaso ti dengue ditoy probinsiya.
Kunana nga uray ado dagiti suplay ti dara iti blood bank ngem saanda a mabalin nga ipaayda kadagiti dengue patients.
Inbatadna a kalpasan a ma-extract ti dara manipod iti donor ket maikabil nga insigida iti laboratory para iti panakaiproseso na tapno agbalin a platelet concentrate.
Innayonna a ti maysa a dengue patient ket agkasapulan ti 15 a bag ti dara ken ad-ado pay nu nakarkaro ti sitwasyon da.
Maianaig iti daytoy, inpaganetget na ti kinapateg iti panakabigbig nu ana ti blood type ti maysa a tao tapno maamwan nu siasinno ti pagkiddawan ti dara.
