LAOAG CITY – Rinugian manen a tinarget ti Estados Unidos ken ti Israeli Military Forces dagiti fuel depot ti Iran ita nga aldaw ti Domingo, Marso 8 kalpasan ti sumagmamano a napipigsa a panagbettak ken dadakkel nga apoy iti siudad ti Tehran.
Basar iti Israeli military, ti panagbomba kadagiti oil storage facilities ti Iran ket paset ti “next phase of war” gapu ta maysa daytoy kadagiti mangsupsuplay ti krudo iti military forces ti Iran a gagem nga ad-adda pay a dadaelen ti military infrastructure ti nasao a pagilian.
Immuna iti daytoy, tinarget metten ti Israel ti dakkel a bilang dagiti fuel storage facility ti nasao a pagilian idi Marso 7.
Daytoy ket kagiddan ti nagbalin a rakurak ni United States President Donald Trump nga agkidkiddaw iti Iranian government ti ‘unconditional surrender’ ken kunana a malpas laeng ti gubat iti nagbaetan kadagiti maseknan a pagilian no sumukon ti Iran wenno agingga a saanen nga agop-operar ti military forces-da.
Maipalagip a dimmawat ti panagpadispensar ni Iranian President Masoud Pezehkian kadagiti kaparangetna a pagilian a paset ti Gulf States gapu kadagiti agsasaruno a missile attacks.
Kabayatanna, kalpasan iti daytoy ket inrakurak met ni Top Iranian Official Ali Larijani nga agsungbat ti Estados Unidos kadagiti inaramidda a tignay ken ti panangirugida ti gubat iti Middle East.
