LAOAG CITY – Dakkel a makatulong kadagiti mannalon ti fuel subsidy nu maaparubran.
Daytoy ti inbatad ni Mr. Rex Aguinaldo ti executive secretary iti ili ti Pasuquin.
Segun ken ni Aguinaldo, iti baet ti panagngato ti presyo ti gasolina ket nasken nga adda ti maipaay a tulong kadagiti manggalap.
Inlawlawagna a tunggal agturong iti payao dagiti manggalap nga adda ti 20 agingga 30 a milya ti kaadayo na manipod iti pampang ket umabot iti sangaribo agingga dua a ribo a pisos ti magastos dagitoy para iti gasolina.
Kuna na a gapu iti daytoy ket masapol nga adda ti makalap nga agingga iti 50 a kilos tapno makaabrot dagiti manggalap.
Nu pay kasta, inbatad na a gapu iti panagngato ti presyo dagiti produkto pakairamanan ti pannakarikna ti tiempo iti amihan ken ti pandemiya ket arig a narigat a makaabrot dagiti manggalap.
Gapu iti daytoy, patien na a mapagsubli ti ad-addo a manggalap ti operasyon da iti baybay nu bilang maipaay ti fuel subsidy.
Maipalagip nga immunan nga inpakaammo ti Bureau of Fisheries and Aquatic Resources (BFAR) a maadal ti pannakaipaay ti fuel subsidy kadagiti mangngalap.
